فيه مسلسل لهاني سلامه اسمه "نصيبي وقسمتك" كل حلقتين او ٣ حكايه مختلفه ...
منهم حكايه انا بجد مش قادره ابطل تفكير فيها ..
هاني سلامه كان اسمه "رائد" وعنده شركه كبيره وناجحه وحب يعرف بيحصل ايه في الشركه من وراه ، كان واثق جدا من ان الناس كلها بتحبه .. لكن كان عنده حب استطلاع يعرف كل صغيره وكبيره بتحصل ..
فقرر انه يراقب الشركه كلها بكاميرات بالصوره والصوت ، وجاب مهندس ودفع مبلغ كبير جداً عشان يركب كاميرات في كل مكتب في الشركه..
اكتشف ان كل الناس اللي كان بيثق فيهم ثقه عمياء بيتكلموا عليه كلام وحش جدا من وراه .. ومحدش بيحبه حب صادق عكس ما كان متوقع ، حتي الانسانه اللي كان هيتجوزها طمعانه فيه .. وكل اللي بيثق فيهم في الشركه بيطعنوه في ضهره وبيحقدوه عليه وعلي نجاحه ..
فطبعا ثقته في الناس اللي بتشتغل معاه انعدمت ، في نفس الوقت حصل كذا موقف من اخته ضايقه وحس انها مش صافيه له ، فقرر يعمل كده كمان في بيته ، ويشوف ويسمع كل كلمه بتتقال فيه ، والكارثه انه اكتشف ان اخته بتحقد عليه جدا ، وبتغير من نجاحه ، وطمعانه في فلوسه وبتتآمر هي وجوزها عليه من كتر حقدهم وغيرتهم منه ..
متخيلين قد ايه بشاعة الموقف !!
واحد عايش في سلام بيحب الناس ومتخيل انهم بيحبوه ، ولما يفتش ويدور يكتشف انه موهوم ومخدوع ..
قد ايه حاجه صعبه ان الواحد يكتشف فجأه ان كل اللي حواليه لابسين وشوش حتي اقرب الناس له ..
عارفين .. القصه دي فعلا ليها هدف وحكمه ، وهي ان ربنا مدينا نعمه كبيره ، نعمة اننا منعرفش ايه بيتقال من ورا ضهرنا ، نعمه اننا منعرفش كل حاجه ..
والمفروض حتي لما نشك ان فيه حاجه بشعه بتحصل من ورانا منسعاش اننا نعرفها .. عشان منتصدمش ونتوجع ..
مشكلة " رائد" كلها انه سمع اكتر من اللازم ، سمع حاجات مكنش لازم يسمعها
.. هو كان بيسمع ويشوف اللي كان المفروض يشوفه ويسمعه لكن هو فضل يدور
وكانت النتيجه انه خسر حياته ودمرها وفقد ثقته في الناس كلها ومبقاش عارف
يعيش وفي اخر الحلقات قال وهو مدمر :
" يارتني ما شفت ، يارتني ما عرفت "
#الحمدلله علي نعمه اننا منعرفش ايه بيتقال من ورا ضهرنا ..ولا نعرف جوا نفوس الناس ايه لينا ..
نصيحه : اوعي تفكر انك تعرف ايه بيتقال من وراك ، او الناس مخبيالك فى
قلوبها ايه .. خليك عايش في سلام احسن ومتخيل ان كل الناس بتحبك
وان الناس كلها صح
وكبر دماغك وعيش وتعايش مع الناس 😊
Post a Comment