القصة الكاملة لاحداث امريكا . عايز تفهم اللي حصل وبيحصل دلوقتي في امريكا؟ انا هقولك خلاصة الخلاصة والقصة الكاملة للي مش فاهم، بس لازم تفهم ان القصة دي كلها البطل الرئيسي فيها هو وباء الكورونا، نتيجة من نتايج الوباء الجديد والحظر بس بشكل غير مباشر، بطل القصة واحد اسمه George Floyd ، راجل افرو-اميريكان يعني اسمر البشرة عنده ٤٦ سنة يعني مش صغير وكان شغال بقاله خمس سنين حارس او سيكيوريتي في مطعم في مدينة مينيابوليس في الولاية دي والدنيا كانت بيس.لحد ما اجتاح وباء الكورونا العالم، وضرب امريكا بالشكل المفجع اللي احنا نعرفه، وعليه قررت امريكا انها تطبق قانون Stay-at-home او الحظر الكلي في البيت واللي كان من ضمن الولايات المتطبق عليها القانون ده هي مينسوتا، ولانه حارس ومبقاش فيه شغل في المطاعم خلاص فا خسر شغله وبقا من ضمن ال٢٠ مليون امريكي عاطل بسبب الحظر، ومفيش فلوس..من ٤ ايام يعني يوم ٢٥ مايو اللي فات الساعة ٨ الصبح، جورج كان جعان، فا مكنش قدامه غير انه يتصرف عشان يفطر ومعوش فلوس، فا اخد عربيته واستخدم ورقة ب٢٠ دولار مزورة عشان يجيب Cup foods، اكل يعني، فا صاحب المحل قفش انها مزورة وبلغ البوليس ، واللي استلم البلاغ اربع ظباط هما الآتي..الظابط الاول هو ظابط من العرق الابيض الامريكي اسمه Derek Chauvin، ظابط رسميا بدوام كامل من ٢٠٠١م، بس ظابط من النوع الرخم، اللي هوا بيتخانق مع دبان وشه وشارته مقوية قلبه، تخيل واحد في تاريخه المهني متقدم فيه ١٨ شكوى بأنه بيتحامى في سلطاته عشان يستقوى عالناس، منهم شكوتين اتأدب فيهم من حكومة امريكا، منها قتل عمد يعني ضرب نار وقتل واحد.التاني بقا اسمه Tou Thao وهو ظابط من ٢٠١٢م، دا تاريخه بقا حافل ما شاء الله، في ٢٠١٧م تم اتهامه إستخدامه المفرط للسلطة تجاة حد يعني ضربه واصابه واتحول للمحكمة ودفع غرامة ٢٥ الف دولار، يعني معروف عنه انه كدة من زمن ومتساب عادي.التالت والرابع هما Thomas Lane و J. Alexander Kueng ودول ظباط صغيرين وسجلهم لسة نضيف، وصباح الفل.المهم لما جالهم البلاغ ده اخدوا الاشارة وتوجهوا لمكان الخناقة دي، الاربع ظباط البيض اللي مش هاممهم حد وتاريخ اتنين فيهم مليان شكاوى، راحوا عشان يتفاجأوا بواحد هجمة من الافرو اميريكان، طول بعرض وشكله زي ما يكون مخمور او شارب مخدرات، فا بكل تناكة امروه انه ينزل ويبطل العربية بس جورج مقبلش التناكة دي تقريبا وقرر انه يقاوم، فما كان من الظابط العنصري ديريك الا انه استخدم القوة عشان ينزله عالارض ويحط في ايده الكلبشات، والتاني يساعده والاتنين التانيين كانوا بيتفرجوا، وكان الموضوع هيخلص عادي بأنهم هياخدوه عالقسم وشكرا،الا ان ديريك واضح انه كان شايف نفسه حبتين وعنصري تجاه اللون الافريقي، وقرر انه يبرك عليه ويحط ركبته فوق رقابته عالارض وكأنه مبسوط بإذلال العرق الافريقي او شايف نفسه احسن منه عشان هو ابيض، وبقا يضغط على رقابته ومش عايز يقوم، جورج نفسه اتكتم وفضل يستنجد بديريك ويقوله انه عنده مشكلة في التنفس ومش قادر يتنفس وانه مكنش سكران لكنه مريض، لكن ديريك مقامش وفضل فوق رقابته ٧ دقايق كاملين، ومكنش يعرف ان جورج كان بيسلم روحه لخالقها، ولما حصلتله ازمة صدرية وبدأ يشتكي من انه مش قادر يتحرك، حتى المية اللي طلبها رفض الظابط انه يجبهاله، الاسعاف وصلت وكل ده ديريك مكنش عايز يحرك ركبته من فوق رقابته، وتم اعلان وفاته.القصة دي حصلت في نص الشارع في مدينة حيوية، قدام الكل، واللي كان حاضر صور الواقعة صوت وصورة بإستنجاد جورج اللي كان باين في الفيديو، وواحد منهم كان طالع لايف عالفيس وخد الاف الشير، ولف الفيديو الكرة الارضية في ثواني عشان الناس كلها تشوفه والدنيا هناك تتقلب، وادى ان شرطة مينيابوليس تقرر فصل الاربع ظباط دول نتيجة للي حصل، لكن القرار ده مهداش الدنيا وبدأت تخرج دعوات للتظاهر للتنديد بالعنصرية اللي بيمارسها البيض تجاه السود، وهي ازمة متوارثة في وجدان الامريكان من ايام الحرب الاهلية في القرن ال١٩ مهما مثلوا التحضر والرقي لكن لسة فيه مشكلة بينهم بتبان في المواقف اللي زي دي.الموضوع تفاقم، وبقا فيه حملات عالسوشيال ميديا بتتهم ديريك بالعنصرية للونه وانه كان لابس طاقية عليها عبارات تجاه البيض وانه كان في الحملة بتاعت دونالد ترامب "تم تكذيب ده كله" وادت لفرض حراسة على بيت الاربع ظباط خوفا من تهور حد والهجوم عليهم، وبدأت تخرج على حسها دعوات للتظاهر، على الرغم من ان وزارة العدل الامريكية طلعت بيان ان التحقيق في قضية جورج اولوية قصوى لكن الموضوع ده مهداش الناس، لدرجة انهم عملوا لجورج نصب تذكاري كرمز للافرو اميريكان، وامبارح بقا الدنيا ولعت في مينيابوليس ..بدأت المظاهرات سلمية بتطالب بالعدل، وبعدها بدأ العدد يزيد، وبدأ الشغب، بقا طوب يترمي وعربيات الشرطة تتكسر ووصل الامر ان المحلات كلها اتكسرت واتسرقت ومبنى الشرطة الرئيسي حرقوه بالكامل زي ما في الصور كدة والدنيا خربت، والشرطة بدورهم نزلوا بلبس مكافحة الشغب وضربوا رصاص مطاطي وقنابل دخان عالمتظاهرين وده اللي هيجهم اكتر، ودخلت على شركات ومحلات وحصلت حادثة قتل في محل منهم، ومباني كتير ولعت في المدينة، بجانب ان فيه مظاهرات في مدن تانية قامت على حس المظاهرة دي في ولايات غير منيسوتا للمطالبة بحق جورج فلويد زي لوس انجلوس مثلا، احنا بنتكلم هنا عن تضرر ٣٠ محل وشركة في المدينة بجانب الازاز اللي اتكسر والمصابين والمباني اللي اتحرقت والعبارات العنصرية اللي اترمت، وغيره وغيره.دلوقتي المظاهرات خلصت، لكن الموضوع مهديش وفيه دعوات تانية للتظاهر والحكومة بتطلع بيانات كل شوية، وطبعا انا مش بهول واقول ده ربيع امريكي لان الموضوع اقل من كدة بكتير لان بالفعل حصل زي ده واكتر في ٢٠١٤م في حادثة مايكل براون لو تفتكروها، بس دا مجرد شرح لكل اللي حصل في الكام يوم اللي فاتوا والسبب في اعمال الشغب اللي صورها مالية الفيس بوك.#منقول