آثار على الرمال

آثار على الرمال

هو اسم فيلم عن قصة "فديتك يا ليلى" ليوسف السباعي، عن موسيقار بيفقد الذاكرة بسبب صدمة، وبيدخل في نوبة هلع، الفيلم سنة 1954، بطولة عماد حمدي وفاتن حمامة، وعمل الموسيقار محمد حسن الشجاعي الموسيقى التصويرية للفيلم، اللي كانت حلوة جدا، ومناسة لحالة البطل والفيلم، للأسف مش متاحة لوحدها بس ممكن تتسمع من تتر الفيلم.

في بداية السبعينات طلب الكاتب اللبناني فارس يواكيم، صديق يوسف السباعي، إنه يحول نفس القصة لمسلسل، وإنه يكتب السيناريو والحوار، وافق السباعي، وكان المفروض إنه تكون أنتاج كويتي، لكن في أخر لحظة اتفق فارس مع التلفزيون اللبناني، وجاب الشاب الصغير اللي ماكلمش 18 سنة، ابن عاصي وفيروز، عشان يعمل الموسيقى التصويرية للمسلسل، كان زياد ماقدمش في مسيرته غير مسرحية سهرية، ولحن سألوني الناس عنك يا حبيبي، وكانت أول مرة يألف زياد موسيقى تصويرية، بل كان أول مرة في تاريخ التلفزيون اللبناني يتم تأليف موسيقى خاصة لعمل درامي، وقدم الشاب زياد، موسيقى من أجمل ما ألف.

موسيقى زياد كل ما تسمعها من غير ما تعرف قصة المسلسل وقصة السباعي وبطل القصة، هتحس بمسة حزن جميلة في الموسيقى، وده تأكيد على قدرة زياد على نقل حالة القصة وحالة البطل اللي هو موسيقار، وبيألف موسيقى على البيانو، اللي بنسمع منها مقاطع أعتقد إنها من تأليف زياد برده، زي ما الشجاعي كان صاحب المقطوعات اللي اتعلبت في الفيلم على ما أعتقد برده.

وكانت نادية الجندي بطلة غلاف الألبوم لموسيقى زياد "أثار على الرمال"